Enrol from overseas

E āhei ana tō rēhita me tō pōti mai i tāwāhi mehemea e pono ana ēnei kōrero katoa mōu: 

• 18 ō tau, pakeke ake rānei
• he wā tōna i 12 marama, roa ake rānei, tō noho tūmau i Aotearoa
• ka hāngai tētahi o ēnei ki a koe:
  
  • he kirirarau koe nō Aotearoa, ā, kua tau mai koe ki Aotearoa i ngā tau e toru kua hipa,
  • he kainoho rānei koe mō ngā take pōti, ā, kua tau mai koe ki Aotearoa i ngā marama 12 kua hipa. 

Ehara i te mea kua herea koe ki te rēhita mai i tāwāhi — kei a koe te tikanga ina rēhita mai, kāore rānei. 

RĒHITATIA, WHAKAHOUNGIA RĀNEI MĀ TE IPURANGI

He kainoho koe mō ngā take pōti? 

He kainoho koe mō ngā take pōti mehemea e whakaaetia ana e te ture tō noho i Aotearoa, ā, kāore koe e herea kia wehe atu i roto i tētahi wā kua āta tohua. 

Nō Niue, nō Tokelau, nō ngā Kuki Airani rānei koe? 

Mehemea nō Niue, nō Tokelau, nō ngā Kuki Airani rānei koe, e āhei ana tō rēhita, tō pōti hoki mehemea kua 12 marama, roa ake rānei tō noho tūmau i Aotearoa. 

Nō Ahitereiria koe? 

Mehemea nō Ahitereiria koe, e āhei ana tō rēhita, tō pōti hoki mehemea kua 12 marama, roa ake rānei tō noho tūmau i Aotearoa.

He kaimahi kāwanatanga koe, nō Te Ope Kātua o Aotearoa rānei? 

Mēnā koe nō tētahi o ngā rōpū e whai ake nei, e āhei ana tō rēhita me tō pōti, ahakoa tō roa i whenua kē atu i Aotearoa:

• ko ngā kaimahi kāwanatanga e mahi ana i tāwāhi, tae atu ki ō rātou whānau 
• ko ngā takawaenga kāwanatanga me ngā māngai tauhokohoko o Aotearoa, tae atu ki ō rātou whānau
• ko te hunga nō Te Ope Kātua o Aotearoa, tae atu ki ō rātou whānau. 

Ka rēhita koe ki te rohe pōti whakamutunga o Aotearoa i reira rā koe e noho ana mō te kotahi marama, roa ake rānei. 

Rapua tō rohe pōti mā te whakamahi i tō wāhitau

He whakapapa Māori ōu, ā, koinei tō rēhitatanga tuatahi? 

Mehemea he whakapapa Māori ōu, ā, koinei tō rēhitatanga tuatahi, he kōwhiringa nui hei whakatau māu i mua i tō rēhita. Tēnā, pānuihia te whārangi e whai ake nei.

Ko te rārangi whānui, ko te rārangi Māori rānei?

Mehemea kua rēhita kē koe, me āta whakaū e koe e tika tonu ana ngā taipitopito mōu. 

Tirohia, whakahoungia rānei ngā taipitopito rēhita mōu

E āhei ana tō tono i tētahi e mōhio nei koe kia tautoko i a koe ki te rēhita, kia rēhita rānei mōu. 

E āhei ana tā tētahi kaitautoko āwhina i a koe ki te whakakī i tō puka

E āhei ana tō tono atu i tētahi kaitautoko, pērā i te hoa, i te whanaunga rānei, kia āwhina i a koe ki te whakakī i tō puka rēhita, kia whakakī rānei i te puka mōu. 

Me waitohu koe i te puka. 

Te tono i tētahi atu kia rēhita mōu

Mehemea kei tāwāhi koe, e āhei ana tō tono i tētahi atu kia rēhita mōu, mēnā kua rēhita hoki taua tangata hei kaipōti. Ka āhei tō tono i tētahi whanaunga, i tētahi hoa, i tētahi tangata rānei kei a ia te mana ā-rōia mōu. 

Mehemea ka tohua ko te whanaunga, ko te hoa rānei kia rēhita mōu, me tuhi rawa e ia ko te ‘Elector overseas — signed by their direction’ ki te taha o tana waitohu i te puka rēhita. 

Mehemea ka tohua kia rēhita mōu ko te tangata kei a ia te mana ā-rōia, me tuhi rawa e ia ko te ‘Elector overseas — Power of attorney’ ki te taha o tana waitohu i te puka rēhita. 

Te āwhina i tētahi e pāngia ana e tētahi māte ā-tinana, ā-hinengaro rānei ki te rēhita mai i tāwāhi

Ki te hia āwhina koe i tētahi kei tāwāhi e noho ana, ā, e raru ana tana whakakī, tana waitohu hoki i te puka rēhita i runga i tana mate ā-tinana, ā-hinengaro rānei, me toro ki te whārangi e whai ake nei kia kitea te ara hei whai māu: 

Te whai āwhina kia rēhita