E āhei ana tō uru ki te rārangi matatapu?
Kāore te katoa e rongo i te haumaru ina tāngia tūmatawhānuitia ai ō rātou taipitopito ki te rārangi kaipōti, engari ehara i te mea mā tērā e riro atu ai tō rātou mana ki te pōti.
Mēnā e māharahara ana koe ki tō haumarutanga, ki te haumarutanga rānei o tō whānau, e āhei ana tō tono kia whai wāhi atu ki te rārangi matatapu. Ka tiakina e mātou ō taipitopito rēhita, ā, kāore e tukuna ki tangata kē.
Ki te noho koe ki te rārangi matatapu, kāore ō taipitopito e kitea i ngā tānga rārangi kaipōti. Kāore hoki e āhei tō tirotiro, tō whakahou rānei i ō taipitopito rēhita mā te ipurangi. Ka pōti koe mā te pōti motuhake ki ngā pōtitanga pāremata, ki ngā pōtitanga ā-rohe hoki.
Kāore e whai pānga ki te rohe pōti e noho nei koe, ki tō kōwhiringa rārangi kaipōti rānei, ahakoa kei te rārangi whānui, kei te rārangi Māori rānei koe.
Me pēwhea te uru ki te rārangi matatapu
Hei tono kia uru ki te rārangi matatapu, kōwhiringia tētahi o ngā whiringa e whai ake nei:
- tīkina ake te puka kei te take tonu o tēnei whārangi, whakakīia, ka īmēra mai ai ki a mātou
- waea mai ki 0800 36 76 56, ā, mā mātou e tuku atu te puka ki a koe mā te poutāpeta.
Mēnā kāore anō koe kia rēhitatia, me whakaoti hoki e koe tētahi puka rēhita. E whai puka rēhita ai koe, tīpakohia tētahi o ēnei kōwhiringa e rua:
- waea mai ki 0800 36 76 56, ā, mā mātou e tuku tētahi puka rēhita ki a koe mā te poutāpeta
- me tikiake tētahi puka rēhita hei whakakī māu, ka whakahoki mai ai ki a mātou.
Te tikiake i tētahi puka rēhita (PDF, 79KB)
Me pēwhea te whakahoki mai i te puka
Tēnā, matawaitia, whakaahuatia rānei tō puka kua oti te whakakī, me ngā taunakitanga hoki, ka īmēra mai ai.
Me īmēra: unpublished.roll@elections.govt.nz
E āhei ana hoki tō whakahoki mai i tō puka kua oti te whakakī, me ngā taunakitanga hoki, ki:
Electoral Commission
FREEPOST 2 ENROL
PO Box 190
Wellington 6140
He aha ngā momo taunakitanga me whakauru e au?
Me tuku mai ngā mōhiohio e whakaatu mai ana i ngā take me noho koe ki te rārangi matatapu. Anei ko ētahi tauira o ngā momo mōhiohio me whakauru e koe. (Ehara i te mea me whai wāhi mai ēnei momo mōhiohio katoa e āhei ai tō tono.)
- He reta e whakamārama ana i te take e mōrearea nei tō noho nā runga i tō mahi, i ngā āhuatanga whaiaro rānei. Mā tō kaituku mahi rānei tēnei reta e tuhi, mā tō rōia rānei, mā tō tauwhiro rānei, mā tō kaitaunaki rānei, mā tētahi tangata whai mana rānei i te hapori.
- He kape o tētahi whakahau whakamarutanga e mana ana i raro i te Family Violence Act 2018.
- He kape o tētahi whakahau aukati e mana ana i raro i te Harassment Act 1997.
- He pārongo nā tētahi pirihimana, nā tētahi āpiha herehere rānei e whakamārama ana i ngā take ka raru pea tō haumarutanga, te haumarutanga rānei o tō whānau ina tāngia tō ingoa me tō wāhitau.
Ka ahatia ina panoni aku taipitopito whaiaro?
Ka whai wāhi atu ana koe ki te rārangi matatapu, me whakamōhio mai koe ki te panoni ētahi o ngā taipitopito rēhita mōu, pērā i tō ingoa, i tō wāhitau rānei. Ka āhei hoki tō tono ki te hoki ki te rārangi kaipōti tūmatawhānui ki te panoni ō āhuatanga whaiaro.
Me whakamōhio mai ngā panonitanga ki ō taipitopito i mua i te weherua pō, 13 ngā rā i mua i te rā pōtitanga.
Me īmērā mai ki unpublished.roll@elections.govt.nz
Mā hea au pōti ai i ahau e noho ana i te rārangi matatapu?
Ka pōti koe mā te pōti motuhake ki ngā pōtitanga pāremata, ki ngā pōtitanga ā-rohe anō hoki.
Ngā pōtitanga pāremata
E āhei ana tō pōti i ngā wāhi pōti katoa i te pōtitanga whānui, i te pōtitake, i te pōtitanga whakakapi rānei. Ka pōti koe mā tētahi pōtitanga motuhake nā te mea kāore e kitea ō taipitopito ki te tānga o te rārangi kaipōti ka whakamahia hei tuku atu i ngā puka pōti i te wāhi pōti.
E taea ai tō pōti motuhake ki tētahi pōtitanga pāremata, me whakakī hoki tētahi puka atu anō hei whakaū i te rohe ki reira rā koe rēhitangia ai hei kaipōti. Ehara i te mea me whakakī koe i te wāhitau, i tō ingoa o mua rānei i te puka ki te kore e hiahia. Heoi anō, mā te tuku i ēnei mōhiohio, ka āwhinatia mātou kia whakaū i tō āhei ki te pōti. Ka tae ana koe ki tētahi wāhi pōti, he tangata i reira hei tohu atu i a koe me aha.
Ngā pōtitanga ā-rohe
E taea ai tō pōti motuhake ki ngā pōtitanga ā-rohe, me whakapā atu koe ki te āpiha pōti o tō kaunihera. I runga i tō noho i te rārangi matatapu, kāore e aunoa te tukuhanga atu o ō pepa pōti ki a koe mā te poutāpeta.
Te tono kia uru ki te rārangi matatapu